Amakuru ari gukwirakwira ku mbuga nkoranyambaga aravuga ko Perezida wa Repubulika Iharanira Demokarasi ya Congo, Félix Tshisekedi, yaba yaguze drones nyinshi zigera ku 200 mu rwego rwo kongera imbaraga mu ntambara ihanganyemo n’ umutwe wa M23.

Aya makuru akomeje gucicukana avuga ko izi drones zigamije gufasha ingabo za leta, zizwi nka FARDC, mu bitero byo mu kirere bigamije guca intege abarwanyi ba M23, cyane cyane mu bice bya Kivu y’Amajyaruguru bikomeje kuberamo imirwano ikomeye.

Nubwo ayo makuru akomeje gukwirakwira, nta gihamya ifatika iragaragaza ko koko higeze habaho igikorwa cyo kugura drones zingana gutyo icyarimwe. Icyakora, nta gushidikanya ko FARDC imaze igihe ikoresha drones mu bikorwa bya gisirikare, ibintu byatumye uru rugamba rufata indi ntera y’ikoranabuhanga.

Ku rundi ruhande, aya makuru avuga ko FARDC yaba yarashe abacancuro b’abanyamahanga bari kuyifasha muri iyi ntambara. Aya makuru nayo ari kuvugwaho byinshi, cyane ko mu bihe bishize hari raporo zagaragaje ko leta ya Congo yifashishije abacancuro mu kongerera imbaraga ingabo zayo.

Gusa nanone, nta makuru yizewe aragaragaza neza ko abo bacancuro barashwe n’ingabo za FARDC, bikaba bishobora kuba byaturutse ku rujijo rwo ku rugamba cyangwa amakuru ataremezwa neza.

Ibi byose bibaye mu gihe M23 ikomeje kwigarurira ibice bitandukanye no gukomeza guhangana n’ingabo za leta, ibintu bikomeje guteza impungenge ku mutekano w’akarere.

Abasesenguzi bavuga ko ikoreshwa rya drones ku mpande zombi riri guhindura isura y’intambara, rikayinjiza mu cyiciro gishya kirangwa no gukoresha ikoranabuhanga rigezweho, ariko rikaba rinateza ingaruka zikomeye ku baturage basanzwe.