Mu Karere ka Rwamagana mu Murenge wa Muhazi ,mu Kagari ka Karambi ,mu Mudugudu wa Kayenzi , haravugwa inkuru y’ umugabo uri mu kigero cy’ imyaka 39 y’ amavuko yiyahuye nyuma y’uko abeshywe ko umugore we wari warahukanye yashatswe n’undi mugabo.

Amakuru dukesha abatuye mu Mudugudu wa Kayenzi, avuga ko uyu mugabo witwa Nizeyimana Jean de Dieu bamusanze mu mugozi yapfuye kuwa Gatandatu tariki ya 29 Ugushyingo 2025. Abaturage bavuga ko abana be aribo batabaje abaturage bari mu muganda rusange.

Abaturanyi ba Nizeyimana bavuga ko kuwa Gatanu tariki ya 28 Ugushyingo 2025, ku mugoroba uwo mugabo yahamagaye umugore we kuri telefoni amubeshya ko abana babo babiri biyahuye mu kiyaga cya Muhazi. Umugore we wari warahukanye yigiriye inama yo guhamagara abaturanyi ababajije amakuru y’abana be bamubwira ko batiyahuye nkuko yabibwiwe n’umugabo we. Hanyuma nawe yigiriye inama yo kubeshya umugabo we aramuhamagara amubwira ko atazongera kubana nawe amubeshya ko yamaze no gushaka undi mugabo.

Umuyobozi ushinzwe umutekano mu Mudugudu wa Kayenzi, Gatoya Jean Pierre, yavuze ko uwo mugabo yiyahuye nyuma y’uko umugore amubwiye ko yashatswe nundi mugabo.Ati “Urupfu twarumenye turi mu muganda rusange, nk’abayobozi twahise tugenda tugezeyo dusanga byarangiye yiyahuye, twahise twitabaza izindi nzego.”Gatoya yakomeje agira ati “Yari amaze iminsi afitanye amakimbirane n’umugore we yari amaze amezi abiri yahukanye. Nimugoroba yahamagaye uwo mugore amubeshya ko abana babo babiri biyahuye mu ruzi noneho nawe amaze kumenya ko yamubeshyaga aramubwira ngo ntabwo nzagaruka naranishakiye.”

Umuyobozi w’Akarere ka Rwamagana, Radjab Mbonyumuvunyi yabwiye itangazamakuru ko Nizeyimana Jean de Dieu yiyahuye nyuma yo kugorwa no kurera abana yasigiwe n’umugore we wahukanye.Yagize ati “Nizeyimana yiyahuye kubera ko yabonaga bimugoye kwita ku bana 2 umugore yari yamusigiye yahukanye.Yabohereje gusenya inkwi bagarutse basanga yiyahuye.”

Meya Mbonyumuvunyi  yakomeje agira ati” Ingamba zihari: twashyizeho amatsinda y’abantu bakuze barimo n’abakozi b’Imana ( Abapadiri, Abapasiteri, Abashehe bafasha Umunyamabanga Nshingwabikowa w’Akagari n’umukozi ushinzwe Iterambere n’imibereho myiza mu kagari  gukurikirana no  gukemura ibibazo by’amakimbirane mu miryango.

Nizeyimana  Jean de Dieu yapfuye yiyahuye nyuma y’uko yagerageje kwiyahura inshuro ebyiri ariko ntapfe. Inshuro ya Mbere yariyahuye akoresheje umuti wica udukoko twangiza imyaka ariko aravuzwa arakora, ni mu gihe yigeze kugerageza kwiyahura inshuro ya kabiri akoresheje umugozi ugacika atarapfa.

Uwo mugabo yapfuye yiyahuye nyuma y’uko mu ntangiriro z’iki cyumweru mu kagari ka Karambi kabarizwa mu Murenge wa Muhazi yari atuyemo naho hari umusore wari umaze igihe gito arangije amashuri yisumbuye nawe wiyahuye akoresheje umugozi.