Mu gitondo cyo kuri uyu wa Kabiri, tariki ya 31 Werurwe 2026, imirwano ikomeye yongeye kubura mu bice bituwe n’Abanyamulenge muri teritwari ya Fizi, Intara ya Kivu y’Amajyepfo, nyuma y’ibitero byagabwe n’ingabo za FARDC zifatanyije n’iz’u Burundi, imitwe ya Wazalendo ndetse na FDLR.
Iyi mirwano yibasiye cyane uduce twa Kalingi, Bidegu, Gakenge na Rugezi, aho amakuru aturuka mu baturage ndetse n’abakurikirana ibijyanye n’umutekano muri aka karere avuga ko umutwe wa MRDP-Twirwaneho wahise witabara ugasubiza inyuma ibyo bitero nyuma y’amasaha menshi y’amasasu.
Abaturage bo muri utu duce bavuga ko babyutse bumva urusaku rw’imbunda ziremereye n’izoroheje, ibintu byabateye ubwoba bukomeye, benshi bahitamo guhunga ingo zabo berekeza mu misozi n’ahandi bakeka ko hari umutekano muke. Amakuru aturuka aho imirwano yabereye agaragaza ko hari ibikorwa by’ubwicanyi, kwangiza amazu ndetse no kwica amatungo, nubwo imibare nyayo y’abahitanwe n’iyi mirwano itaramenyekana.
Aka gace ka Fizi, by’umwihariko mu misozi ya Minembwe, kamaze igihe kirekire karangwa n’intambara zishingiye ku makimbirane y’amoko, politiki n’inyungu z’ibihugu byo mu karere. Umutwe wa Twirwaneho uvuga ko washinzwe mu rwego rwo kwirwanaho no kurengera abaturage b’Abanyamulenge, mu gihe FARDC ikomeje gukorana n’imitwe irimo Wazalendo mu kurwanya uyu mutwe.
Hagati aho, umutwe wa FDLR ukomeje kuvugwaho kugira uruhare mu guteza umutekano muke mu burasirazuba bwa Repubulika Iharanira Demokarasi ya Congo, aho ugaragara mu mitwe ifatanya na FARDC mu bitero bitandukanye. Ibi bibaye mu gihe hari amasezerano mpuzamahanga agamije kugarura amahoro muri aka karere, ariko akomeje gushyirwa mu bikorwa gahoro.
Abasesenguzi bagaragaza ko ugenzura imisozi ya Minembwe aba afite ijambo rikomeye ku mutekano w’akarere, cyane cyane ku mijyi yo mu bibaya nka Uvira ndetse n’inzira z’ubucuruzi, bigatuma aka gace gakomeza kuba indiri y’imirwano idacogora.
Mu gihe ibiganiro bya dipolomasi bikomeje, abaturage bo muri utu duce bakomeje kuba ibitambo by’iyi mirwano, benshi bakaba bari mu buhungiro, ubuzima bwabo bukarushaho kujya mu kaga. Abahanga mu bya politiki bemeza ko mu gihe hataboneka igisubizo kirambye ku bibazo by’umutekano mu burasirazuba bwa Congo, imirwano yo muri Fizi ishobora gufata indi ntera ikagira ingaruka zikomeye ku karere kose k’Ibiyaga Bigari.
