Nyuma y’uko imiryango y’Afurika nka EAC na SADC ihuriye mu gushaka umuti w’ibibazo bimaze igihe mu burasirazuba bwa Repubulika Iharanira Demokarasi ya Congo (DRC), habaye impinduka mu biganiro, aho Angola itakiri umuhuza w’u Rwanda na DRC.
Kuri uyu wa Mbere tariki 24 Werurwe 2025, hateganyijwe inama izahuza Abakuru b’Ibihugu bigize Umuryango wa Afurika y’Iburasirazuba (EAC) n’Umuryango w’Ubukungu wa Afurika y’Amajyepfo (SADC), kugira ngo bigire ku bibazo bimaze igihe mu burasirazuba bwa Congo. Iyi nama iza nyuma y’ibiganiro byabaye tariki 24 Gashyantare 2025, byashyizeho abahuza batatu batoranyijwe; Olusegun Obasanjo, Uhuru Kenyatta, na Hailemariam Desalegn Boshe.
Minisitiri w’Ububanyi n’Amahanga w’u Rwanda, Amb. Olivier Nduhungirehe, yatangaje ko hashobora kongerwaho umuhuza wa kane, kugirango bakomeze ibiganiro byibanda ku mutekano w’u Rwanda no kubaka umubano mwiza hagati ya Congo na M23.
Angola yari yarashyizweho nk’umuhuza hagati y’u Rwanda na DRC, ariko Minisitiri Nduhungirehe yatangaje ko ibiganiro bya Luanda na Nairobi byahujwe, bituma igihugu cya Angola kiva mu nshingano zo kuba umuhuza, nyuma y’imishyikirano hagati y’impande zombi.
Angola yemeje ko nyuma yo gukoresha imbaraga zose, harimo gusenya umutwe wa FDLR no gukuraho ingamba z’ubwirinzi, bitabashije gutuma inama y’Abakuru b’Ibihugu iba tariki 15 Ukuboza 2024. Perezida João Lourenço wa Angola, ashyira imbere inshingano z’Umuryango wa Afurika Yunze Ubumwe, ariko ibiganiro bizakomeza kuyoborwa n’abahuza bashyizweho.
Izi mpinduka zitegerejweho umusaruro mushya muri 2025 mu gutanga icyerekezo gishya mu gushaka umuti w’ibibazo by’umutekano mu burasirazuba bwa DRC.
