Mu gihugu cya Nigeria, umukwe yabengeye umugeni ku rusengero, ubwo bari bagiye gusezerana kubana akaramata imbere y’Imana, nyuma yo gusanga yaramuhishe ko asanzwe ari umubyeyi w’abana bane.
Iyi nkuru yamenyekanye binyuze mu binyamakuru byo muri iki gihugu, nka www.punchng.com www.vanguardngr.com no ku mbuga nkoranyambaga nka “ghpage_tv”.
Izi mbuga, zagaragaje uyu musore yafashe icyemezo cyo guhagarika ubukwe,ubwo igikorwa cyo kubasezeranya kigezemo hagati, abantu barumirwa.
Uyu musore ngo yari yishimiye gushyingiranwa n’umukobwa, ariko aza gukubitwa n’inkuba avumbuye ko nyamukobwa yamuhishe ko asanzwe ari umubyeyi w’abana bane.
Ubwo umugabo yari amaze kumenya aya makuru, kwiyumanganya byaramunaniye ahita ahagarika ubukwe mu rusengero.
Videwo yatambutse ku rubuga rwa ghpage_tv, umugeni yagaragaye arira yicaye hasi mu gihe abagore bagenzi be bageragezaga kumuhoza.
Umukwe yumvikanye agira ati: “ntabwo yambwiye ko, asanzwe afite abana bane.”Bamwe mu bakoresha imbuga nkoranyambaga nti bigeze borohera uyu mugeni, kuko benshi bavuze ko uyu mugore adakwiye kugirirwa impuhwe kubera ibikorwa bye byiganjemo kutabwiza ukuri gusezesuye uwo bari bagiye kubana akaramata.