Perezida wa Iran, Ibrahim Raisi yaguye mu mpanuka y’indege yabaye kuri iki Cyumweru tariki ya 19 .05.2024 mu ntara ya Azerbaijan.
Abandi bayiguyemo ni Minisitiri w’Ububanyi n’Amahanga, Hossein Amir Abdollahiyan; Imam w’Umusigiti wa Tabriz, Ayatollah Al-Hashemi na Guverineri, Azerbaijan, Malik Rahmati.
Iyo mpanuka yabereye mu mujyi wa Jolfa uherereye mu burasirazuba bw’igihugu hafi ya Azerbaijan, mu birometero 600 uvuye muri murwa mukuru Tehran.
Urupfu rwa Perezida rwamenyekanye nyuma yo kubona ibisigazwa by’indege byakongowe n’umuriro.
Mu gitondo cya kare cyo ku cyumweru, Perezida Raisi yari yagiye muri Azerbaijan mu muhango wo gutaha urugomero yari yatumiwemo na mugenzi we Perezida Ilham Aliyev. Uru rugomero ruri ku mugezi wa Aras ni urwa gatatu rwubatswe ku bufatanye bw’ibihugu byombi.Ni ruzinduko rwabaye mu gihe umubano w’ibihugu byombi utifashe neza nyuma y’igitero cyagabwe kuri ambasade ya Azerbaijan i Tahran muri 2023.