Mu gihe umutekano ukomeje kuzamba mu burasirazuba bwa Repubulika Iharanira Demokarasi ya Congo (RDC), icyemezo cy’ihuriro rya AFC/M23 cyo gusubira inyuma ku ntera ya kilometero 30 riva ku birindiro byaryo cyateje impaka ndende mu bya politiki n’umutekano.
Iri tangazo ryasobanuwe nk’intambwe igamije “kugabanya ubushyamirane” no “gushimangira icyizere,” rikaba rihuje n’imvugo isanzwe ikoreshwa mu biganiro by’amahoro mu ntara za Kivu y’Amajyaruguru na Kivu y’Amajyepfo zimaze igihe zarazahajwe n’intambara.
Hari abaryakiriye nk’ikimenyetso gishobora gufungura amarembo y’ibiganiro hagati y’impande zihanganye, ndetse rikerekana ko AFC/M23 ishobora kwinjira mu nzira ya dipolomasi ifashijwe n’imiryango mpuzamahanga n’iyo mu karere. Ibi bituma uyu mutwe ugaragara nk’ushaka guhindura ingamba, uva ku guhangana ku rugamba ugana ku biganiro.
Gusa inyuma y’ayo magambo yuje icyizere, hagaragaramo indi nkingi ikomeye: gushyiraho ibisabwa, AFC/M23 yagaragaje ko kwimura ingabo bizakorwa gusa igihe nta bikorwa byo kuyihungabanya bizaturuka ku butegetsi bwa Kinshasa. Mu gihe hagize igikorwa gifatwa nk’igitero, uyu mutwe ushobora guhita usubiza mu buryo bwihuse.
Ibi bigaragaza neza imiterere y’iyi ntambara, aho amagambo y’amahoro ahora avanze n’itegurwa ry’intambara. Bituma icyizere hagati y’impande zihanganye gikomeza kuba gike, kuko buri ruhande rukomeza kwitegura ibishobora kuba.
Iyo usesenguye iri tangazo, bigaragara ko ridashingiye gusa ku rwego rwa gisirikare, ahubwo rifite n’uruhare rukomeye mu itumanaho rya politiki. AFC/M23 iri kugerageza kwiyerekana nk’umufatanyabikorwa ushaka kugabanya ubushyamirane, ariko nanone igasiga ifite imbaraga zo gukomeza urugamba igihe bibaye ngombwa.
Ubu buryo bwo gukoresha amagambo n’ibikorwa bugamije intego ebyiri: kwerekana ubushake bwo kugana amahoro no kugumana igitutu cya gisirikare gishobora kuyifasha kugira ijambo rikomeye mu biganiro.
Mu by’ukuri, si ugushyira hasi intwaro burundu, ahubwo ni uburyo bwo guhindura ingamba bugamije kugumana ijambo ku rwego rwa dipolomasi, hatirengagijwe imbaraga ziri ku rugamba.
Bityo, buri tangazo ryo gusubira inyuma riba rifite ubutumwa bwinshi bugenewe abahuza mu biganiro, abaturage bugarijwe n’intambara, ndetse n’ubutegetsi bwa Congo.
Ikindi kigaragara ni uko AFC/M23 ishaka kwiyubakira isura y’umutwe wubahiriza ibyo utangaza. Ibi bigamije kwitandukanya n’ubutegetsi bwa Kinshasa mu bijyanye n’icyizere, no kwiyereka abafatanyabikorwa mpuzamahanga nk’uruhande rushobora kubahiriza ibyo rwiyemeje.
Nubwo hari abasesenguzi babona ibi nk’intambwe nziza mu mikorere ya politiki y’uyu mutwe, ukuri kwabyo kuzakomeza gushingira ku bikorwa bifatika. Mu biganiro by’amahoro bikiri mu ntege nke, amagambo yonyine ntahagije,igipimo nyakuri ni uguhuza ibyo bavuga n’ibyo bakora.
Muri rusange, nubwo AFC/M23 yasubiye inyuma ku rugamba mu buryo bwatunguranye, igitutu ku butegetsi bwa Kinshasa kiracyari kinini, bigaragaza ko urugendo rugana ku mahoro rukiri rurerure kandi rutoroshye.
